عوامی وردی انسان دوست قیادت /محمد سرفراز کی تحریر

— لیفٹیننٹ جنرل افتخار علی خانؒ (یومِ پیدائش 5 جنوری)
لیفٹیننٹ جنرل (ریٹائرڈ) افتخار علی خانؒ 5 جنوری 1941ء کو چکری، ضلع راولپنڈی میں پیدا ہونے والی وہ ہمہ جہت عسکری شخصیت تھے جن کی زندگی خدمت، سادگی، عوام دوستی اور پیشہ ورانہ وقار کا حسین امتزاج تھی، اور آج ان کا یومِ پیدائش عقیدت و احترام سے یاد کیا جا رہا ہے۔ کیڈٹ کالج حسن ابدال سے تعلیم اور اکتوبر 1961ء میں 26ویں پی ایم اے لانگ کورس سے کمیشن لینے کے بعد انہوں نے 11 بلوچ، 28 بلوچ اور 5 آزاد کشمیر رجمنٹس میں خدمات انجام دیں، 1965ء اور 1971ء کی جنگوں میں عملی شرکت کی اور ہلالِ امتیاز (ملٹری) و ستارۂ بسالت جیسے اعزازات حاصل کیے۔ اعلیٰ مناصب پر فائز رہتے ہوئے—نیشنل ڈیفنس کالج میں چیف انسٹرکٹر، صدر ڈیفنس کالج، کمانڈر XXXI کور بہاولپور، چیف آف جنرل اسٹاف (جی ایچ کیو)—ان کی قیادت کا امتیاز یہی رہا کہ وہ حکم نہیں، حوصلہ دیتے تھے؛ بہاولپور میں جوانوں اور ان کے اہلِ خانہ کے لیے میلوں ٹھیلوں اور ثقافتی سرگرمیوں کا انعقاد، مسائل کی فوری شنوائی، رہائشی کوارٹرز کی بروقت صفائی و سہولتوں کا بندوبست اور غریب و عام آدمی تک براہِ راست رسائی ان کی انسان دوست سوچ کی روشن مثالیں ہیں۔ ان کا تعلق چکری سے تھا مگر محبت کا دائرہ پورے پاکستان تک پھیلا ہوا تھا؛ ایک عام سپاہی اور عام شہری دونوں انہیں اپنا سمجھتے تھے۔ ریٹائرمنٹ کے بعد بطور سیکرٹری دفاع قومی خدمت کا سلسلہ جاری رکھا، جو ان پر اعتماد کی دلیل ہے۔ 22 اگست 2009ء کو دل کا دورہ جان لیوا ثابت ہوا اور 23 اگست کو انہیں چکری میں سپردِ خاک کیا گیا؛ آج ان کے یومِ پیدائش پر قوم اس نیک سیرت، عوامی اور محبوب جنرل کو خراجِ عقیدت پیش کرتی ہے—اللہ تعالیٰ انہیں جنت الفردوس میں اعلیٰ مقام عطا فرمائے، آمین۔